18. GALA-Abend

Und scho wyder liigt dr 18. Galaobe hinter uns!
Mir chönne ufe zfriedene Obe zrugg luege mit viel Glungenem und einige musikalische wie kulinarische «Füürwärk». Es het alles tiptop klappt!
Mir hän gwüssi Pöschte in dr Organisation in däm Joohr neu vergeh gha, was natürlich immer zur Froog führt «klappt alles?!» . Wie im Vorfäld scho absehbar, het dä Wäggsel aber wunderbar funktioniert!
E grandiosi Tombola mit tolle Priise het d’Lüüt no um Mitternacht drzue bewegt, azstoh, zum ihre Gwünn freudestrahlend entgäge z’neh! Wär het ächtsch dr Hauptpriis, s’grosse Velo, gwunne?
De Urs!!! Jetzt chan er ame mit em Velo in d`Prob cho. :-)
S’Chuechebüffet het ebefalls für strahlendi Gsichter gsorgt. Für jede Gschmagg hets öbbis drbi gha! Dangge allne liebe Spänder/inne!
Mir hän e üsserscht feins Gala-Menü unserne Gescht dörfe serviere, nochdäm sy bim Ygang d’Tücke vo dr modärne Technik churz hän müesse erläbe. Unseri Lüüt am Ygang hän die technischi Useforderige aber souverän überbrüggt, so dass am Schluss alli unseri Gescht e Platz in dr passend zu unserer erfolgriiche Texas/Oklahoma-Tournee gschmüggte Halle gfunde hän.

Do no e Dangg an alli hälfende Händ, wo bereits im Vorfäld und am Frydigzobe d’Turnhalle zu ihrem amerikanische Glanz verholfe hän.
Die usführligi Bewärtig vom musikalische Teil überlon y gärn unserem Dirigänt. D’Afangsnervosität het sich im Verlauf vo unserem alt-bewährte Stück Gigolo mit jedem Takt meh glegt, so dass mir mehr oder weniger barat gsi sin für s’rasante Tempo vo Misteriosa venezia. Stimmig ufcho isch denn gmeinsam mit unserne drei Jüngste bi de Schwiizer Stimmigslieder, wo mir und s’Publikum in die eint oder ander Richtig ins Schunkle cho sin. Bewegig im AOA!
Bewegig findet me bi uns im AOA aber nid nur uf, sondern au näb dr Bühni! Es wird gsprunge, serviert, Kaffirahm spontan organisiert, an dr Bar Gedrängg usgschänggt und wär vo all däm immer noni müed isch, schwingt zur Musikg vom Trio Wollkebruch no s’Tanzbei!
Nid z’vergässe, sin notürli unseri hochkarätige Musiggescht d’Oesch’s die Dritte, wo während 2x45min alli mit ihrem Programm begeisteret hän! Bim Czardas isch es denn muggsmüüslistill im Saal gsi! So, wie sich das unsere Dirigänt vor em Aspyl vo unserne Stügg ame au wurd wünsche.
Y glaub, y darf sage, es isch e glungene und in de Wort vo unserem Presidänt fantastische Galaobe gsi und es gilt unsere Dangg allne, wo’s möglich mache, dass dä Alass in däm Rahme cha stattfinde!
MERCI!

Non ne Notiz am Rand. Jetz dörfe mir uns alli ufs Bowle am Donnschtig z`Obe freue. Mol luege, obs dört au so rund lauft!